Førde Cup 2026 – ei fantastisk fotballhelg!

Foto: Stig Roger Eide

Gjennom tre dagar har fotballspelarar frå Vestland og Møre & Romsdal fylt hallane med fotballglede, innsats, spenning og godt samhald. Det har vore høg aktivitet frå fyrste avspark fredag til siste kamp søndag, og vi har fått oppleve mange jamne kampar, flotte prestasjonar og store augeblikk.

Resultata frå finalane for dei ulike klassane (vinnaren av klassen/sluttspelet er utheva):

J13/14 A-Sluttspel: Førde 1 5-0 Gaular, IL
J13/14 B-Sluttspel: Vik, IL 1 2-1 Førde
J13/14 C-Sluttspel: Masfjorden/Gulen Y 2-0 Vik, IL 2
G13 A-Sluttspel: Førde 4 4-5 Høyang, IL
G13 B-Sluttspel: Bergsøy IL 2 2-1 Jølster IL
G14 A-Sluttspel: Høyang, IL 2-1 Jølster Grøn
G14 B-Sluttspel: Bergen Nord, FK – Lilla 1-3 Bergen Nord, FK – Gul
J15/16 A-Sluttspel: Bergen Nord, FK J16 3 0-4 Bergen Nord, FK J16 1
J15/16 B-Sluttspel: Vik 0-2 Eidsvåg IL
G15/16 A-Sluttspel: Førde 3 1-2 Førde 2
G15/16 B-Sluttspel: Flaktveit IK 2 4-3 Masfjord G16 1
G15/16 C-Sluttspel: Førde IL 2011 Svart 3-0 Gaular, IL
J19 A-Sluttspel: Førde 2 1-0 Førde 1
G19 A-Sluttspel: Høyang, IL 2-1 Førde 1

Fotballglede i tre hallar

Det har vore flotte arrangement både i Naustdalshallen, Halbrend og Førdehuset. Alle tre arenaene har vore fylte med aktivitet, engasjement og mykje god fotball. Det er kjekt å sjå korleis turneringa samlar spelarar, trenarar, lagleiarar, føresette og publikum til ei felles fotballhelg.

Med 202 lag og nesten 500 kampar er Førde Cup eit stort arrangement å gjennomføre. At vi kan tilby så mange lag eit godt kamptilbod over tre dagar, er noko vi er stolte av. Samstundes er det viktigaste at spelarane får gode opplevingar, utviklar seg og kjenner på gleda ved å vere ein del av eit fotballfellesskap.

Ein stor takk til alle som bidrog

Eit arrangement av denne storleiken kjem ikkje av seg sjølv. Det ligg ein stor innsats bak, og vi ønskjer å rette ein ekstra stor takk til alle dei frivillige som har stilt opp før, under og etter turneringa.

Takk til alle som har bidrege i sekretariat, kiosk, servering, rigging, rydding og med praktisk gjennomføring i hallane. De har lagt ned ein fantastisk innsats og er heilt avgjerande for at vi kan arrangere Førde Cup.

Vi vil også takke alle dommarane som har leia kampane gjennom helga. De har gjort ein viktig jobb med å sikre god gjennomføring og gode rammer for spelarane.

Sist, men ikkje minst, ein stor takk til alle laga som tok turen til Førde. Takk for at de ønskte å delta, for innsatsen på bana og for at de bidrog til å skape ei positiv og inkluderande turnering. Vi håpar de har hatt ei fin helg og reiser heim med gode fotballminne.

Vi gler oss allereie til neste gong!

Førde Cup handlar om meir enn resultat og tabellar. Det handlar om å vera ein møteplass, fotballglede, utvikling og samhald på tvers av klubbar og miljø. Styret i Førde Cup og vi i Førde IL Fotball er stolte av arrangementet og svært takksame for alle som har bidrege til å gjere Førde Cup 2026 til den suksessen det vart.

Tusen takk for ei fantastisk helg – vi håpar å sjå dykk alle igjen neste år!

Førde Cup 2027 blir arrangert 5.-7. november 2027, påmeldinga opnar i juni!